१०८ अंकाचे पावित्र्य आणि उगम​

हिंदू शास्त्र व पुराणात सर्वत्र १०८ या अंकाचा उल्लेख आढळतो. हिंदुंच्या जपमाळेत १०८ मणी असतात. कोणताही मंत्र किंवा नामजप हा १०८ वेळा उच्चारतात, का बरे? सत्यनारायणाच्या पूजेत एक विधी आहे ज्यात आपण १०८ तुळशीची पाने कृष्णाला वहातो. विष्णू सहस्त्रनामात १०८ श्र्लोक आहेत. श्री गणेशाला १०८ नावे आहेत आणि श्री यंत्रातही १०८ छेदन बिंदू आहेत तसेच देवीची १०८ शक्तिपीठे आहेत. बहुतेक बुध्द मंदिरास १०८ पायर्‍या व १०८ स्तंभ असतात. काय रहस्य आहे ह्या मागे?

आपल्या प्राचीन आयुर्वेदिक शास्त्रानुसार मानवाच्या शरीरावर १०८ दाब बिंदू आहेत. जिथे चेतना आणि मांस मिळून मानवाला जीवन प्राप्त होते. खगोल शास्त्राने प्रमाणित केल्यानुसार सुर्य आणि चंद्र यांतील अंतर सुर्याच्या व्यासाच्या १०८ पट आहे.

असं सांगतात की सुर्याचा व्यास हा पृथ्वीच्या व्यासाच्या १०८ पट आहे आणि पृथ्वी व चंद्र यातील अंतर हे देखील चंद्राच्या व्यासाच्या १०८ पट आहे.

वेदांमधे १०८ या अंकाचा उल्लेख शिव शक्तिच्या निरुपणात केलेला आहे. शिव नित्य व साधेपणाचे प्रतीक आहे. हा गुण पुरुषत्वाशी संबंधित आहे. शक्ति स्त्रीलिंगी समानता, अराजकता आणि जटिलतेचे प्रतीक आहे. त्यांचा संयोग संतुलन दर्शवितो.

सूर्य जो शिवाचे रुप आहे तो एका वर्षात ३६० अंशाची राशी चक्राची एक परिक्रमा पुरी करतो. २७ नक्षत्रही आकाशात ३६० अंशाचे चक्र बनवतात. प्रत्येक नक्षत्राची चार पदे असतात, एकूण २७ x ४ = १०८ पदे होतात. नक्षत्रावर चंद्राचे अधिपत्य असते जे शक्तिचे रुप आहे.

सूर्य-चंद्र शिवशक्ती द्वारे सृष्टीची दिव्य उर्जा प्रकटते. शक्ती शिवाला संतुलित ठेवते म्हणून १०८ या अंकास पवित्र मानून शास्त्रोक्त महत्व दिले गेले आहे.कोणत्याही शुभ मंत्राचे १०८ वेळा उच्चारण केल्याने त्या मंत्रास अलौकिक शक्ती प्राप्त होते. १०८ वेळा मंत्र म्हंटल्याने शक्ति त्या मंत्राची ताकद वाढवते आणि त्या मंत्राचा परिणाम साध्य होण्यास मदत करते.